SPAM SA TEXT SOBRA NA

BANTAY GOBYERNO SERIES 014
Ni Ka Iking Seneres

SPAM SA TEXT SOBRA NA

Nagsumbong si Virgs Tudla na sobra na daw ang dami ng natatangap niyang mga spam messages sa kanyang cell phone, at marami sa mga messages ay mga black propaganda galing sa mga kampo ng pulitiko. Nagtanong si Virgs kung saan kumukuha ng mga number ang mga nagpapadala ng spam. Ang sabi ko, malaking negosyo ang pag-bebenta ng mga cell numbers, at maari pa nga na ang mga telco pa ang nag-bebenta ng mga ito.

Ako rin ay maraming natatanggap na spam messages, at kasama na rin dito ang mga messages na padala ng mga telco mismo, para sa kanilang mga promo. Akala ko ba pinagbawal na ng National Telecommunications Commission (NTC) ang spam messages? Kung hindi kaya ng NTC na ipatupad ang sarili nilang patakaran, ano pa kaya ang silbi nila?

Bilang isang consumer advocate, minumungkahi ko na hindi lamang ang NTC ang dapat magbantay sa kapakanan ng mga tao kung tungkol sa cell phone services, dahil dapat sumama na rin sa pagbabantay ang Department of Trade & Industry (DTI). Simple lang ang reason ko, dahil ang cell phone services ay isang industriya kaya sakop pa rin ito ng DTI.

Ganyan din ang pananaw ko bilang isang consumer advocate pagdating sa gamot. Hindi lamang ang Department of Health (DOH) ang dapat na nagbabantay ng kapakanan ng mga tao tungkol sa gamot, kasama na rin dapat ang DTI. Pareho din lang ang reason ko, dahil ang mga gamot ay mga produkto na binibili ng tao, kaya sakop pa rin dapat ng DTI.

Mukhang mahirap bantayan ang spam messages galing sa mga pulitiko, ngunit parang madali lang bantayan ang mga messages galing sa mga telco mismo, dahil sila din ang nagpapadala ng mga messages na ito, at alam naman nila na ginagawa nila ito. Naisip ko lang, bakit hindi ang mga telco ang magbayad sa mga users kung sila ang nagapapadala ng spam?

Simple din lang ang reason ko sa idea ko. Hindi ba ang spam ay isang uri ng advertising? Kung nagbabayad ang mga telco para mag-advertise sa TV at sa radio, bakit hindi sila magbayad kung sila ay mag-advertise sa text? Huwag nilang sabihin na dapat libre sila, dahil ang mga tao ang may-ari ng mga unit. Hindi ba kayo na-iistorbo tuwing kayo ay nakakatanggap ng spam message galing sa telco? Istorbo nga, kaya dapat lang magbayad sila, dahil may pakinabang naman sila sa pagbenta ng kanilang mga promo.

Ang ibig ko sabihin ng pagbabayad nila, ay magbigay na lang sila ng extra na load tuwing sila ay magpapadala ng spam. Sa bawat spam na pinapadala nila, magbigay na lang sila ng piso na load, para patas na ang laban natin, kahit pa ma-istorbo tayo.

Good luck sa National Council for Commuter Protection (NCCP) sa pag-takbo nila bilang party list number 163. Kasama natin sila sa advocacy dahil ang commuter protection ay kakambal ng consumer protection. Dagdag pa sa sinabi ko, dapat magbantay na rin sa kapakanan ng tao ang DTI pagdating sa transport services, dahil ang transportation ay isang industriya na sakop din ng DTI, kaya hindi lamang Department of Transportation & Communications (DOTC) ang dapat na magbantay.

Mag-sumbong kayo kay Ka Iking kung may nakikita kayong kamalian sa gobyerno. Lahat tayo ay dapat mag Bantay Gobyerno! Mag text kayo sa +639293605140 o di kaya mag-email kayo sa iseneres@yahoo.com

BAWAL KAININ ANG LOAD NG CELLPHONE!

BANTAY GOBYERNO SERIES 013
Ni Ka Iking Seneres

BAWAL KAININ ANG LOAD NG CELLPHONE!

Nagsumbong si Alvin Quilang na marami na raw siyang text na hindi nakakarating sa kanyang pinapadalhan. Naalala ko na kailan lang halos impossible na mangyari ito, dahil noong araw, bawat text na pinapadala ay nakakarating na walang mintis.

Sa interview ko kay Senate President Juan Ponce Enrile, sinabi niya na ang dahilan kung bakit may mga text na hindi nakakarating ay systems overload, na ang ibig sabihin ay higit na napakarami ang nagpapadala ng text kumpara sa kaya ng sistema ng mobile phone companies.

Noong nakaraan binunyag ni Senator Enrile na ang dahilan sa pagkaubos ng load ng mga tao ay ang SPAM, kung saan sinisingil ang mga tao ng mga telco sa pagpadala ng mga messages na may nakatago palang singil. Parang nagawan na ng paraan ang problemang ito, at lumalabas na iba pang problema itong mga load na nawawala.

Sa paliwanag na binigay ni Enrile, ang systems overload daw ay katulad ng traffic sa daan, kung saan masyadong maraming sasakyan ang dumadaan samantalang napakaliit naman ng kalye. Sa usapang traffic, naisip ng gobyerno ang paraan ng color coding, ngunit ano naman kaya ang solution ng gobyerno sa systems overload ng text messages?

Ang National Telecommunications Commission (NTC) ang ahensiya ng gobyerno na nakatalaga upang pangalagaan ang kapakanan ng mga tao. Ano naman kaya ang ginagawa ng NTC sa problemang ito? Sa simpleng usapan, ang pagkawala ng text ay isang uri ng pagnanakaw kaya dapat tugunan ito ng NTC sa lalong madaling panahon.

Malinaw ang pananaw ni Enrile na ang negosyo ng mga telco ay isang prangkisa na ibinigay ng gobyerno sa mga pribadong kumpanya na maaring bawiin sa kanila kung lalabagin nila ang mga kundisyon na ibinigay sa kanila. Kaya nga lang, dapat ay andap ang NTC sa pagbantay sa kanila at dapat walang pinapaboran ang NTC kahit sino pa ang may-ari ng mga telco. Kung hindi pa nag-ingay si Enrile tungkol sa mga load na nawawala, hindi pa kumilos ang NTC, kaya duda ako na may pinapaboran sila.
Nag email si Jamil Lumbao, isang OFW mula sa Saudi Arabia upang sabihin na sang-ayon siya sa advocacy ng National Council for Commuter Protection (NCCP) kaya iboboto niya raw ang NCCP bilang party list number 163 sa darating na election. Sabi niya, makatao daw ang pinaglalaban ng NCCP kaya ito na ang pinili niya na party list.

Madalas ko nang sinasabi na ang commuter protection ay kakambal ng consumer protection. Ito rin ang sinabi ni JM Nepomuceno sa kanyang email na pinadala sa akin. Ang wish ko ngayon ay magkaroon din ng isang council para sa consumer protection, katulad ng council ng NCCP para sa commuter protection.

Marami na ang nakakabasa ng Bantay Gobyerno at marami na rin ang nagsusumbong. Ang wish ko din ay maging sumbungan ng bayan ang column na ito, sa lahat ng kamalian na ginagawa ng gobyerno, kasama na rin ang mga hindi nila ginagawa na dapat nilang gawin.

Mag-sumbong kayo kay Ka Iking kung may nakikita kayong kamalian sa gobyerno. Lahat tayo ay dapat mag Bantay Gobyerno! Mag text kayo sa +639293605140 o di kaya mag-email kayo sa iseneres@yahoo.com

ANG VAT SA TOLL AY TAX ON TAX

BANTAY GOBYERNO SERIES 012
Ni Ka Iking Seneres

ANG VAT SA TOLL AY TAX ON TAX

Na interview ko si Senator Juan Ponce Enrile sa aking TV show at sinabi niya on the air na ang mungkahi ng BIR na magpataw ng VAT sa toll ay hindi lamang unconstitutional, ito ay isang paraan na magpataw ng isa pang karagdagang tax sa isang tax na napataw na.

Sinabi ni Manong Johnny na talagang tungkulin ng gobyerno ang magbigay ng mga basic services katulad ng tubig at kuryente at sa pagbibigay nito ng mga services, hindi na dapat patawan pa ng mga buwis. Ayon sa kanyang pananaw, ang pagpagawa ng mga daan ay tungkulin din ng gobyerno, at hindi na nga dapat patawan ng tax ang pag-gamit ng mga daan kasama ang mga tollways.

Natutuwa naman ako at sumasang-ayon si Manong Johnny sa pinaglalaban ng National Council for Commuter Protection (NCCP) na lababan ang pagpataw ng VAT sa toll. Sa tingin ko, segurado na ang kanyang panalo dahil number four na yata siya sa survey. Kung nagkataon na mananalo din ang NCCP bilang party list, magkakaroon na rin siya ng kakampi sa Congress sa katauhan ng mga NCCP nominees. Ang NCCP ay nasa balota na bilang party list number 163.

Lumabas na ang totoong istorya kung bakit na disqualify daw diumano ang NCCP bilang party list. Ayon sa unang pagtingin ng Comelec, inakala nilang walang mass support ang NCCP dahil sa maling basa na dalawa lang ang regional offices ng NCCP. Mabuti na lang at nalinawan na baliktad pala ang basa, dahil sa buong Pilipinas, dalawa lang ang region na walang opisina ang NCCP. Dahil dito, nanatili pa rin sa balota ang NCCP bilang numero 163.

Nakasakay na ba kayo ng habal-habal o di kaya ng skylab? Ang habal-habal ay isang sistema ng transport kung saan ang pasahero ay nakasakay lamang sa likod ng motorcycle driver, kung minsan tatluhan kung minsan apatan hindi ko alam kung papaano! Ang skylab naman ay parang habal-habal din ngunit ang mga pasahero ay nakasakay sa magkabilang panig ng motorcycle sa pamamagitan ng mga kahoy sa tabi na parang mga katig ng bangka. Nakakatuwa itong tingnan, ngunit hindi nakakatawa ang panganib na hinaharap ng mga pasahero na tiyak na walang insurance pa.
Isa sa mga panukala ng NCCP party list number 163 ang pagbibigay ng mga incentives para sa mga industriya ng transport upang maging moderno at ligtas ang kanilang mga sasakyan. Kasama na rin diyan siyempre ang pagpa-baba ng pasahe, dahil kung may matanggap na tulong ang mga transport sa pagbili ng sasakyan, bababa din ang kanilang investment.

Dahil sa kakulangan ng sasakyan sa mga probinsiya, nauso na nga ang habal-habal, skylab at pati na rin ang kuliglig, isang sasakyan na hinihila ng hand tractor. Dahil sa walang masakyan, mapamaraan ang mga Pinoy kaya kahit papaano nakakaraos din.

Ang insurance para sa mga public transport ay mahalagang issue dahil bahagi ito ng commuter protection. Kawawa naman talaga ang mga pasahero kung may aksidente at kung wala silang matanggap na damages. On the other hand, parang hindi naman kaya ng mga operator ng habal-habal, skylab at kuliglig na bumili ng insurance. Ano kaya ang dapat nating gawin?

Mag-sumbong kayo kay Ka Iking kung may nakikita kayong kamalian sa gobyerno. Lahat tayo ay dapat mag Bantay Gobyerno! Mag text kayo sa +639293605140 o di kaya mag-email kayo sa iseneres@yahoo.com

KONTRATA SA TAXI BAWAL

BANTAY GOBYERNO SERIES 011
Ni Ka Iking Seneres

KONTRATA SA TAXI BAWAL

Nagsumbong si Mr. Olan Steiner, isang Amerikano na ibinaba daw siya ng isang taxi at iniwan sa highway dahil ayaw niyang magbayad ng 700 pesos upang ihatid siya sa Alabang. Ayon sa kuwento ni Mr. Steiner, pinasakay na siya ng taxi driver bago siya inalok ng kontrata, at nang hindi siya, pumayag, pinababa na lang siya at iniwan siya sa highway.

Hindi turista si Mr. Steiner, dahil maari siyang ituring na balikbayan. Bagamat siya ay isang Amerikano, siya ay may asawa na Pilipina na kasama niyang umuwi upang mag-retire dito sa Pilipinas.

Dalawa ang punto ko sa usapan na ito. Kung nagkataon na turista si Mr. Steiner, nakakahiya na, nakakahinayang pa dahil talagang hindi na siya babalik at sasabihin pa niya sa kanyang mga kababayan na huwag na pumunta dito. Nagkataon nga lang na retiree siya, kaya masama pa rin ang nangyari, dahil tinutulak ng gobyerno ang retirement program upang magkaroon tayo ng mga dayuhan na investors.

Ayon sa National Council for Commuter Protection (NCCP), hindi dapat tinatanggihang isakay ng ano mang pangpublikong sasakyan ang sino mang pasahero, lalo na ang taxi. Kasama ang puntong ito sa mga karapatan ng mga commuters na kinakampanya ng NCCP. Dagdag pa ng NCCP na dapat maihatid sa patunguhan ng magalang na driver ang pasahero.

Binigyan ko ng NCCP Incident Report Form si Mr. Steiner upang maisumbong niya sa LTFRB ang pangyayari. Bagamat masipag naman ang LTFRB sa pag-tanggap ng mga reklamo ng mga pasahero, marami pa ring violation sa mga karapatan ng commuters ang nangyayari. Ito ang isa sa mga dahilan kung bakit naisipan ng pamunuan ng NCCP na maging party list, upang magpasa pa ng mga batas na magbibigay ng higit pa na kapangyarihan sa LTFRB na habulin ang mga tiwaling driver na lumalabag sa batas. Ang NCCP ay kasama na sa balota bilang party list number 163.

Lumabas sa balita na na disqualify diumano ang NCCP bilang party list. Huwag kayong mabahala sa balita na ito, dahil nasa balota na ang NCCP at tuloy pa rin ang pagtakbo nito para sa kongreso.
Nabasa ni Mr. Herman Tiu Laurel ang aking column at sumang-ayon siya sa panukala ng NCCP na labanan ang pagpataw ng VAT sa toll fees. Ayon kay Ka Mentong, dapat daw magkaroon ng lie-in sa SLEX at NLEX upang makarating sa gobyerno ang mahigpit na pagtutol ng mga tao sa panukala na ito. Sang-ayon siya sa aking sinulat na para na ring double taxation ang mangyayari kung matuloy ang VAT na ito. Dagdag pa ni Ka Mentong, dapat magkaroon ng maraming media sa lie-in, upang lumabas kaagad sa balita ang protesta na gagawin. Isang malaking karangalan para sa isang kulumnista na katulad ko na basahin ng isang kapwa kulumnista na katulad ni Ka Mentong.

Bilang reaction sa sinabi ni Ka Mentong, sinabi rin ni Ms. Elvie Medina ang founder ng NCCP na may tumawag na sa kanya na mga bus operators na handang mag-barikada sa SLEX at NLEX kung saka-sakaling itutuloy pa ng gobyerno ang VAT. Sana mabasa ng mga tamang opisyal ng gobyerno ang column na ito, upang iatras na nila ang VAT kaagad-agad.

Mag-sumbong kayo kay Ka Iking kung may nakikita kayong kamalian sa gobyerno. Lahat tayo ay dapat mag Bantay Gobyerno! Mag text kayo sa +639293605140 o di kaya mag-email kayo sa iseneres@yahoo.com

LABANAN ANG PAGPATAW NG VAT SA TOLL

BANTAY GOBYERNO SERIES 010
Ni Ka Iking Seneres

LABANAN ANG PAGPATAW NG VAT SA TOLL

Nagsumbong si Ms. Elvie Medina, ang founder ng National Council for Commuter Protection (NCCP) na may balak na naman daw ang BIR na magpataw ng VAT sa mga toll fees ng SLEX at NLEX. Masama daw ito ayon kay Ms. Medina, dahil kung may VAT na sa toll, tiyak na tataas na rin ang bayad sa toll dahil tiyak na ipapasa ng mga toll operators ang gastos nila sa VAT sa mga motorista.

Of course ang mga motorista ang unang magiging biktima ng pagtaas ng VAT sa toll, ngunit tiyak na ang mga commuters na rin ang susunod na magiging biktima, dahil kung tataas ang toll, tiyak na tataas na rin ang pasahe sa mga bus na dumadaan sa toll roads. Wika nga, parang domino effect ito. Ang mangyayari pa, baka tumaas na rin ang halaga ng mga bilihin, dahil ang mga truck na nagdadala ng mga paninda ay tataasan na rin ang toll.

Ang NCCP ay isa nang party list ngayon at kasama na sila sa balota ngayong election bilang party list number 163. Sang-ayon ako sa panawagan ng NCCP na labanan ang pagpataw ng VAT sa toll, dahil sa aking pananaw, ito ay isang paraan ng double taxation.

Sa totoo lang, ang mga tao ay nagbabayad na ng income tax at nagbabayad na rin ng VAT sa mga bilihin, sa pag-asa na ang gobyerno ay magpapagawa ng mga infrastructure katulad ng mga highway. Sa malungkot na pangyayari, napupunta sa corruption ang malaking collection ng BIR, kaya naman nauwi tayo sa situation na kailangan na payagan ang mga private toll operators na magtayo ng mga highway. Kaya naman kahit nagbayad na tayo ng tax, nagbabayad pa tayo ng toll. Sa ngayon, gusto pa ng BIR na magbayad tayo ng VAT sa toll, kaya double taxation na ito, doble parusa pa.

Malaki ang bilib ko sa NCCP, dahil matagumpay na ito sa pagpababa ng pasahe ng dalawang beses. Kaya ng 7 pesos na lang ang pasahe ngayon, dahil sa pagtutol ng NCCP na taasan pa ito. Matagumpay na rin ang NCCP ng isang beses sa paglaban sa pagtaas ng toll sa SLEX, kaya naman medyo mababa pa ngayon ang bayad ng mga motorista. Sana magtagumpay ulit ngayon ang NCCP sa paglaban sa pagpataw ng VAT sa toll.
Kung nakinabang na tayo sa ginawa ng NCCP na labanan ang pagtaas ng pasahe at ng toll sa SLEX, ano kaya kung maging matagumpay sila sa pagpanalo ng mga kinatawan sa kongreso dahil sila ngayon ay tumatakbong party list number 163? Wala pa nga silang mga congressman, malaki na ang kanilang nagawa, ano pa kaya kung nasa congress na sila? Ang pagkakaroon ng mga congressman ang matinding paraan upang mabigyan ng protection ang mga karapatan ng mga commuters. Kaya na nating gawin ito, kaya gawin natin ito sa araw ng election.

Masasabi natin na maraming party list ngayon na peke, na hindi naman talaga marginalized. May mga party list na wala naman talagang kinalaman sa mga sectors. Ngunit ang NCCP ay tunay na kumakatawan sa lahat ng mga commuters, mga mayayaman man sila o mahihirap. Kung nais ninyo makiisa sa NCCP, mag log on kayo sa http://nccp.webs.com o di kaya mag text kayo sa 09276330526. Maari kayong tumawag sa 331-6227 o magpadala ng fax sa 559-3381.

Mag-sumbong kayo kay Ka Iking kung may nakikita kayong kamalian sa gobyerno. Lahat tayo ay dapat mag Bantay Gobyerno! Mag text kayo sa +639293605140 o di kaya mag-email kayo sa iseneres@yahoo.com

WALANG SCHEDULE ANG MGA BUS

BANTAY GOBYERNO Miyerkules, Abril 14, 2010 SERIES 009
Ni Ka Iking Seneres

WALANG SCHEDULE ANG MGA BUS

Nagsumbong si Mr. Alberto Cardenas na nahihirapan daw siyang mag-commute dahil wala daw siyang makitang schedule ng mga bus at iba pang mga sasakyang pang-publiko. Nag react lamang si Alberto sa sinulat ko tungkol sa National Council for Commuter Protection (NCCP) ngunit sa tingin ko, valid naman ang mga punto niya.

Ayon kay Alberto, halos wala o di kaya kulang ang mga directional signs in other words mga karatula dito sa Pilipinas para sa mga pasahero at kasama na daw ang mga safety signs kaya kawawang kawawa daw ang mga commuters dito sa atin. Hindi lamang convenience ang tinutukoy niya, pati na rin ang kaligtasan ng mga pasahero.

Ayon naman kay Atty. Tony Estrella, isang abogado ng NCCP, may karapatan ang mga pasahero na magkaroon ng “peace of mind” tuwing sila ay sumasakay sa mga public transport, kaya tugma naman talaga ang sinabi ni Alberto na dapat daw may security ang mga pasahero, at ang ibig niyang sabihin ay dapat daw maging panatag ang kalooban ng mga pasahero na hindi sila magiging biktima ng krimen o di kaya disgrasya habang sila ay sumasakay. Dagdag pa ni Atty. Estrella na maari daw na mag-demanda ang mga pasahero kung sa tingin nila ay nalabag ang kanilang karapatan sa kaligtasan.

Ayon naman kay Ms. Elvie Medina, ang founder ng NCCP, ito nga ang dahilan kung bakit ginawa na nilang party list ang NCCP, upang mapag-laban nila ang karapatan ng mga pasahero. Ang NCCP ay kasama na sa balota ngayong darating na election, sa numero bilang 163. Kung matutupad ang pangarap ng NCCP, maari na silang magkaroon ng mga party list sa kongreso kung saan nila dadalhin ang kanilang mga pinaglalaban.

Ayon din kay Ms. Medina, kahit noon pa na hindi pa tumatakbo bilang party list ang NCCP 163, ginagawa na nila ang tinatawag niyang “commuter education”, kung saan itinuturo ng NCCP 163 sa mga pasahero ang kanilang mga karapatan. Dagdag pa ni Ms. Medina na kahit hindi pa sila party list, nagawa na nilang mapababa ang pasahe ng dalawang beses, kaya nga daw naipako na sa ngayon ang pasahe sa 7 pesos.
As of now, parang malayo pa sa kaisipan ng DOTC ang konsepto ng paglalagay ng mga wastong directional at safety signs sa mga kalye, lalo na sa mga kalsada na dinadaanan ng mga sasakyan. Baka ang mangyayari pa nga, magtuturuan lang ang DOTC at ang mga local governments kung sino talaga sa kanila ang dapat maglalagay ng mga ito.

Mukhang malayo din sa kaisipan ng DOTC ang sinasabing “peace of mind” ng mga pasahero. Kung ganito nga naman ang situation natin, baka wala din sa kanilang kaisipan ang pagtatayo ng mga modern transport terminals. Ayon sa NCCP, hindi sila nangangako dahil hindi naman sila mga pulitiko. Mabuti na lang, nagawa na nilang mag-bigay ng mga serbisyo sa mga pasahero kahit wala pa sila sa kongreso. Ano kaya ang gagawin natin upang lumawak ang kaisipan ng DOTC?

Mag-sumbong kayo kay Ka Iking kung may nakikita kayong kamalian sa gobyerno. Lahat tayo ay dapat mag Bantay Gobyerno! Mag text kayo sa +639293605140 o di kaya mag-email kayo sa iseneres@yahoo.com

DAANAN NG MGA TAO, INAAGAW NG GOBYERNO

BANTAY GOBYERNO Biyernes, Abril 09, 2010 SERIES 008
Ni Ka Iking Seneres

DAANAN NG MGA TAO, INAAGAW NG GOBYERNO

Nagsumbong si Dra. Cora Claudio, isang environmentalist na napakarami na raw mga local government na hinahayaan na lang ang mga malalaking negosyante na agawin ang mga sidewalks at mga beaches para sa kanilang pansariling interest. Sa totoo lang, ang mga pribadong tao talaga ang umaagaw ng mga sidewalks at beaches na ito. Kaya lang, parang lumalabas na ang mga local governments na rin ang umaagaw, dahil wala namang ginawa ang mga local officials na ito upang pigilan ang mga pangyayari. Lumalabas tuloy na parang kasama sila sa raket. In other words, parang sila na rin ang umagaw.

Bilang halimbawa, kapansin pansin na talamak sa Quezon City ang pag-paparada ng mga pribadong sasakyan sa mga sidewalks. Wala namang sumisita sa mga nakaparada, kahit pulis wala, kahit barangay tanod, wala rin. Alam naman ng lahat na may raket sa ganitong kalakalan. Siyempre, parang mga watch your car boys lang ang kumikita, ngunit hindi maiwasang magduda ang karamihan na may hatag din sila sa mga pulis, at kahit sa mga tanod, may inaabot din sila. Ano kaya ang ginagawa ni Mayor Belmonte sa issue na ito? Dapat may gagawin siya, otherwise baka magduda na rin ang mga tao na kasama siya sa raket?

Samantala, sa bandang dako naman ng City of Manila, may mga coastal walkways na hindi na malakaran ng mga tao, dahil sinamsam na ito at occupied na ng mga pribadong kumpanya. Wala na bang silbi ang batas ng public domain sa siyudad ng Maynila? Hindi ba sinabi ni Mayor Lim na “the law applies to all or none at all”? Kung ganoon nga, bakit parang exempted na sa batas ang mga private companies na ito?

Doon naman sa labas ng Metro Manila sa bandang Cavite at Batangas, maraming mga beaches na hindi na mapasok at hindi na magamit ng mga tao, dahil hinarangan na ito ng mga hotel. Mas grabe pa diyan, ang ilang mga beaches ay ginawa na ring parking lots ng mga hotel. Bakit nga ba nangyayari ito?

Nagsumbong si Dra. Claudio pagkatapos niyang malaman na ang National Council for Commuter Protection (NCCP) ay tatakbo na sa election bilang party list (Numero 163 sa balota). Ang NCCP 163 ang nagpapaba ng pasahe sa bus at jeepney noong nakaraang taon, at sila rin ang nagpapigil sa pagtaas ng toll fees sa SLEX. Kaya naman sinabi ni Dra. Claudio na dapat ay isama na rin ng NCCP 163 ang paglaban sa pagnakaw ng mga sidewalks at ng mga coastal walkways, kasama na ang mga public beaches.

Sa tingin ko, may punto naman si Dra. Claudio. Ang mga taong naglalakad dapat sa mga sidewalk ay ang mga taong nagiging commuters na rin. Ang gusto ng NCCP 163 ay ang kaligtasan ng mga pasahero, ngunit dapat isama na rin nila ang kaligtasan ng mga pedestrian. Ilang tao na kaya ang nasagasaan at namatay dahil nahagip sa mga kalye na walang sidewalk, o di kaya kung may sidewalk man ay hindi na malakaran ng mga tao?

Dapat isama na rin ng NCCP 163 ang pag-mungkahi na magtayo ang mga local government ng mga tama at modernong transport terminal, upang hindi mapilitan ang mga bus, taxi at jeepney na gawing terminal ang mga kalye. Isa pa itong dahilan ng trapik. Sa madaling sabi, parang naagaw na rin ang mga kalye, dahil sa kapabayaan ng mga local governments.

Mag-sumbong kayo kay Ka Iking kung may nakikita kayong kamalian sa gobyerno. Lahat tayo ay dapat mag Bantay Gobyerno! Mag text kayo sa +639293605140 o di kaya mag-email kayo sa iseneres@yahoo.com

INTRAMUROS HARANG SA TURISTA

BANTAY GOBYERNO Biyernes, Abril 02, 2010 SERIES 007
Ni Ka Iking Seneres

INTRAMUROS HARANG SA TURISTA

Hindi na kailangan na may mag-sumbong pa kung ako mismo ang makakita. Ako ay nagpunta sa Intramuros noong isang araw, at nakita ko kung gaano ka dumi ang distritong ito na supposed to be ay bahagi ng tourist belt sa lungsod ng Maynila.

Sino na ba ang responsible ngayon sa paglilinis ng Intramuros? Ang city government ba ng Maynila o ang Intramuros Administration? Para sa akin, hindi na issue kung sino ang responsible. Kung sino man sa kanila, dapat gawin na nila ang kanilang tungkulin, at kung saka-sakaling silang dalawa ang responsible, dapat huwag na silang mag-turuan at dapat mag-tulongan na lang sila.

Sa isang bahagi ng Intramuros na malapit sa Letran, nakita ko ang dalawang canal na napakarumi, maitim at stagnant ang tubig at punong-puno ng basura. Sa tingin ko, health hazard na rin ito para sa mga estudyante, dahil maraming schools doon at parang bahagi na rin ito ng University Belt.

Kawawa naman ang mga turistang nagagawi sa Intramuros ngayon. Biro mo, nag-biyahe sila ng malayo para makakita lang ng maduming tourist spot na masakit sa mata kung tingnan. Kawawa din ang bayan natin, dahil hindi magandang makita ng mga turista ang dumi sa ating kapaligiran.

Harang sa turista ang nakikita nila sa Intramuros, at lumalabas na parang niloko lang natin sila sa kanilang pag-punta dito. Hindi naman nga tanga ang mga taong ito, kaya segurado ako na sa pagbalik nila sa kanilang mga bayan, masamang kuwento ang kanilang gagawin sa kanilang mga kababayan kaya tiyak na wala nang susunod sa kanila sa pagpunta dito.

Sa isang bahagi ng Intramuros na ayon sa marker ay dating original location ito ng UST, puro talahib na lang ang nakikita at halatang halata ito dahil nasa tabi lang ito ng Manila Cathedral. Sino ba ang may-ari ng ruins na ito? Ang simbahan pa rin ba o ang gobyerno na? di bale na kung sino, dapat ayusin na lang ito. Gaya ng sinabi ko, huwag na sanang magturuan ang gobyerno at simbahan, dahil dapat pagtulungan na lang nila ito. Sa ibang bansa katulad ng Greece, tourist attraction pa rin kahit ang mga ruins.
Sa ibang mga bansa sa Asia, more than 10 million na ang kanilang mga tourist arrivals, samantalang dito sa atin, kulang-kulang pa sa 5 million ang mga turista. Sa sarili kong pagbibilang, sobra sa 4 million sa mga arrivals ay mga Pilipino rin na umuuwi kaya hindi natin sila matatawag na tunay na turista. Sa makatuwid, halos 1 million lang ang mga dayuhang turista, kaya kumpara sa ibang mga bayan sa Asia, 10% lang ng tourists nila ang totoong arrivals natin.

Mukhang masipag naman itong si DOT Secretary Ace Durano, ngunit kung hindi niya nagawang i-angat ang numero ng turista sa loob ng kanyang termino, hindi ko masasabi na matagumpay siya sa kanyang tungkulin. Ang dapat niyang gawin, linisin niya muna ang mga maduduming mga tourist spots, dahil kung pangit ang kanyang mga produkto, sino naman kayang gago ang bibili nito? Kung puro papogi nga ang ginagawa ni Durano, pangit pa rin ang kanyang dating kung pangit ang ating mga tourist attractions. Kahit sa mga Filipino na umuuwi, pangit pa ring ipakita ang mga ito.

Mag-sumbong kayo kay Ka Iking kung may nakikita kayong kamalian sa gobyerno. Lahat tayo ay dapat mag Bantay Gobyerno! Mag text kayo sa +639293605140 o di kaya mag-email kayo sa iseneres@yahoo.com

MAHABANG LUNCH BREAK SA GOBYERNO

BANTAY GOBYERNO Miyerkules, Marso 31, 2010 SERIES 006
Ni Ka Iking Seneres

MAHABANG LUNCH BREAK SA GOBYERNO

Nagsumbong si Mr. Alejandro Evangelista ng San Juan City tungkol sa sobrang mahaba at matagal na lunch break ng mga City Hall employees doon sa kanila. Ayon sa kanya, mga alas 10:30 pa lang daw ng umaga ay nawawala na ang mga employees sa mga service counters at kung bumalik sila ay halos mga 1:30 na ng hapon.

Ayon kay Mr. Evangelista, nag-react at sumang-ayon siya sa sinulat ko sa aking column na dapat walang lunch break as passport service ng DFA sa consular section, kung saan sinabi ko na dapat magtalaga na si Secretary Alberto Romulo ng mga duty officers tuwing lunch break, upang hindi maputol ang pag-bibigay ng service sa mga applicants, at upang mabawasan na rin ang haba ng pila.

Sa tingin ko, mahusay naman magpatakbo ng gobyerno si Mayor JV Ejercito, ngunit kahit ganoon pa man, maaring nalulusutan siya ng kanyang mga empleyado, dahil napakahirap nga naman para sa isang mayor na bantayan lahat ng nangyayari sa loob ng kanyang City Hall. In fairness naman kay Mayor JV, nangyayari naman ito sa halos lahat ng tanggapan ng gobyerno, local man o national, kaya hanapan na lang natin ng solusyon upang malutas ang problema na ito.

Kung 10:30 nga ang alis ng mga masuwerteng empleyado at 1:30 na ang kanilang pagbalik, tatlong oras talaga ang kanilang lunch break, at ang ibig sabihin niyan ay nakakanakaw sila ng dalawang oras sa loob ng isang araw. Sa tingin ko, isa nga itong uri ng pagnanakaw, at maari pang sabihin na ito ay isa ring uri ng corruption, dahil nababawasan nito ang kaban ng bayan kahit sa ibang pamamaraan.

Mahirap talaga para sa mga local at national officials na bantayan ang oras ng kanilang mga tauhan. Ika nga, mabigat na laban ito, ngunit may magagawa naman ang mga officials na ito kung pag-aaralan lang nila ang problema na ito. Halimbawa, marami namang mga efficiency experts sa private sector na maaring tumulong sa kanila. May mga software monitoring systems din na available at maari na nilang gamitin kung type nga nilang gumamit ng technology upang matapos na ang problema na ito.
Sa South Korea, gumamit na ng computer software ang mga local governments nila upang malaman kung gaano katagal lumakad ang papel mula sa isang empleyado papunta sa susunod na empleyado, sa loob ng isang proseso. Successful at proven na ang system na ito, at kinilala na nga ng United Nations ang local government ng Seoul sa matagumpay na pagpatupad nito.

Hindi naman lahat ng mga efficiency experts sa private sector ay naniningil ng pera upang ibigay ang kanilang serbisyo at kaalaman. Kahit pa man sila ay maningil, kaya naman seguro ng maraming local governments ang mga fees nila.

Sa aking pagsusulat, ayaw ko naman na puro salita lang ako, dahil gusto ko namang makatulong sa mga local governments kung talagang gusto nilang magbago na ng sistema. Kung efficiency experts o di kaya kung computer systems lang ang kailangan nila, makakahanap naman ako para sa kanila.

Mag-sumbong kayo kay Ka Iking kung may nakikita kayong kamalian sa gobyerno. Lahat tayo ay dapat mag Bantay Gobyerno! Mag text kayo sa 09293605140 o di kaya mag-email kayo sa iseneres@yahoo.com

BARA-BARA WALANG SISTEMA SA PASSPORT

BANTAY GOBYERNO Lunes, Marso 29, 2010 SERIES 005
Ni Ka Iking Seneres

BARA-BARA WALANG SISTEMA SA PASSPORT

Apat na ang nagsumbong sa akin magmula nang lumabas ang Bantay Gobyerno. Nauna na si Manny Bulatao at si Angel Averia, ngayon naman nagsumbong si Donato Quirino at si Federico Aquino. Kung kayo ay may reklamo sa gobyerno, magsumbong na rin kayo. Maliban pa sa diyaryo, pinapadala ko rin ang column ko sa mga senador at congressman kaya tiyak na maririnig ang reklamo ninyo!

Ayon kay Quirino, matagal na raw na naghahanap ng masumbungan ang mga applicant ng passport, dahil nga sa nagmahal ito bigla na hindi alam ng mga tao. Ito ang sinabi ni Quirino: “Good work! We need people who can speak for the poor and the weak in our society. Kudos to you, more power to you. The pen is really mightier than the sword. You will earn a lot of followers. I salute you for having no fears in hitting directly the culprits in government for nobody else will. You are my new hero”.

Ayon naman kay Aquino, sinamahan niya raw ang kanyang pamangkin sa pag-apply ng passport, at nagulat siya na wala pa ring maayos na sistema sa pag-apply ng passport. Bara-bara at magulo na, hinaluan pa daw ng kawalang galang at kabastusan dahil sa mga guardia na kung umasta ay parang mga pulis sa checkpoint. Nagtanong lang daw si Aquino kung saan siya magbabayad, sinagot daw siya ng guardia na may tonong galit, at tinanong pa siya kung marunong ba siya magbasa. Sabi ni Aquino, college graduate naman daw siya, kaya marunong siyang magbasa, ngunit ang karatula naman daw sa cashier ay napakaliit at halos hindi mabasa.

Nagtanong din si Aquino sa akin kung bakit may comfort room sa consular na exclusive lamang sa mga kawani ng DFA. Bakit nga ba? Mas mataas na uri ba sila kumpara sa mga karaniwang tao? Iba pa ba ang kanilang pangangailangan kung sila ay gumagamit ng palikuran? Di bale na kung si Secretary Alberto Romulo ay may sariling comfort room sa kanyang opisina dahil boss naman siya, ngunit bakit hiwalay pa ang comfort room ng kanyang mga tao?

Nakasagap din ng usap-usapan si Quirino na kaya daw bumilis ang pagpasok ng e-passport ay dahil may mga opisyal daw sa consular na binibigyan ng libreng ticket sa eroplano ng supplier ng e-passport, at sagot daw ng supplier pati lahat ng mga gastos nila sa abroad. Totoo kaya ito? Marahil totoo ito kung walang bidding ang pag-award ng e-passport contract. Kung ito nga ay dinaan lang sa palakasan, kailangan nga talagang mag PR ang supplier sa mga opisyal ng consular. Teka muna, hindi ba corruption ito? Kahit ticket at travel expenses lang ang ibinigay, pera pa rin yan kaya dapat imbestigahin na rin ito ni Romulo. Alam niya kaya ito?

Mukhang hindi alam ni Romulo ang mga kamalian sa consular, dahil seguro malayo na ito sa Roxas Boulevard. Nakarinig pa ng daw si Quirino ng usap-usapan ng mga taga DFA na sinabon daw ni Romulo ang hepe ng consular, dahil sa lumabas sa column ko. Ito pa ang sinabi ni Quirino: “Just to give you good news. May kagat ang column mo. The bite took Romulo to move and give orders to reprimand the head of consular”. Hindi kaya drama lang ito ni Romulo? Baka naman gusto niya lang palabasin na hindi niya alam ang mga kamalian at pinapasa lang niya ang paninisi? Sisihan blues!

Mag-sumbong kayo kay Ka Iking kung may nakikita kayong kamalian sa gobyerno. Lahat tayo ay dapat mag Bantay Gobyerno! Mag text kayo sa 09293605140 o di kaya mag-email kayo sa iseneres@yahoo.com